Duhaisam tikimtu

 Phuahtu: Sangtea Ronald

Nang ngei hi duhaisam tikimtu,

Hmangaihna partin kan tlan dun kha;

Tunah lunglai herin min liamsan,

Run rempui tur i tawng ta em ni?

Hetiang reng hi ka phal dawn si lo,

Mangṭha tih zawng ka dawn ngam lo;

Hmangaihnain chin lem a nei si lo,

Aw, rairah riang tur reng ka lo ni e.

Tawn thar di ṭang belin her mah la,

Hmangaihna enchimloh kan hlan zawng kha;

Hawilo par thliah ni pawh thleng mah se,

Ngilh ni reng I awm thei dawn si lo.

Kawpte'n kan len rem mai se aw,

Hmun khawhar nghakin rairah riang tan;

Chung Khuanu relin lo kir leh mai rawh.

Lung ka vai

Phuahtu : Sangtea Ronald

Mahriaktea ka dawn chang hian,
Thinlai na a thar leh ṭhin;
Ka hmangaih ka duhaisam,
Ṭhenna tur kawl a her si maw.

Aw kan lenlai ni zawngte,
Hmanlai an chang zo ta;
Tunah zawng ṭuanna tlanga dang ta si maw,
Nang ngai hian lung ka vai ruai e.

I dawn ve ṭhin em lungrunpui,
Kan thiamthu di zawngte kha;
Thamral maia'n ka phal lo,
Tunah zamuala liam ta si.

Hun leh ni te an liam zela,
Ṭang dang I lo bel ta si;
Ka tuar thiam lo a na e,
Mahte'n luaithli ka nul leh ṭhin.

Chhingkhual lanu

Phuahtu : Henry MS Dawnga

Chhingkhual channa vangkhuaah
Ka tawng tleitir sakhmel ṭha chung;
A sakruang kimtlang a mawi hluan e,
A chhingzo ngei lanu leng zawng;
Ka nuam ngei e aw biahthu hlan mai.

Ka duhaisam tleitiri chu, ka ṭangah lo bei vein,
Hmangaih biahthu min hlan se;
Kei ka lunglawm, a kim ngei ang,
Mah se bei tisei thlawn mai lo ni e.

Ka dawn ṭhin zantlai nemah,
Tawnmang lamah tawn leh ka nuam;
Mah se tawn ni reng awm thei si lo,
Lairil zawnga fan ṭhin ngei e.
Engtin tawng leh thei ngai ang maw?

Aw sakhmel ṭha chuangi kha,
Rial ang dai ni renga awm lo'ng;
Kei ka thinlai ruka luah ngei e,
Ngilh nan lungloh tui pawh dawnin,
Ngaih tizualtirtu mai an chang si.

Lungdum

Phuahtu : Chama khawlhring

1. Lungdumtu reng tawng lo va,
Hun hei leh chen a liam hnuin;
Dar ang sakhmelmawi,
Lungrun ka lo tawn che;
Nang ngei hi maw lo ni,
Ka tawnmang lungdumtu;
I kianga len hi, ka nghakhlelh ṭhin asin.

Enga'n hmanah nang nen,
Sakhmel kan intawn loh?
Chungkhuanu'n a lo ruat sual em ni;
Biahthu 'D' hrilh a rem silo,
Lengdang tawnah i vul tawh si.

2. Mahse, lungrun ka ngai ngam lo,
Lengdang ṭanga i bei tur hi;
Theih chang se aw lungrun,
Hmangaihna par tlanin,
Tudang reng ngai lovin,
Rinawmna vawng dunin,
Nang nena len dun hi ka duhaisam a ni.

Mp3 download-na

Kumtluang atan

Phuahtu: Joe Hlondo

1. Ka ngaizual ṭhin e chawrhthlapui en changin,
Tawn loh kar pawh rei lo mah se;
Dar ang tawn leh ni,
Herchhuak thuai se aw lungrunpui;
Sen nau iangin ka ṭangah bei la.

Chutin leng dang ka ngai bil lo'ng,
Hlimte'n laikhum kan zal dun tawh ang.

Lenna tlang te dang mah se,
Leng dang pawh chhai lul suh aw,
Zuna uai a na ngei asin;
Mahse, bawihte i tan hian maw,
Aw ka tling zo lo tih ka hai bik nem;
Min hnawl lul lo'ng che.

2. Aw ka hlimna tur beiseina-in ka tlir fo ṭhin,
Nang chauh lo chu tling zo an awm lo;
Aw min hlan mai rawh,
Biahthu 'D' aw min hlan mai rawh;
Kumtluang atan.

Mp3 download-na

Lung a leng em mai

1. Hringnun par vullai reng hi,
A tawi lua em mai;
Aw kan tawn hian maw,
Chuaiin a liam lung a leng em mai.

Dan zawh rual loh hian maw,
Luaithlipui ka lo nul e;
Nang ngaih suihlunglen hi,
Engtikah bang ang maw?
Hun herliam zel mahse, i sulhnu leh nun hluite,
Ka ngilh lo'ng khuarei thleng pawhin.

2. Tu leh fa chawi a dam chhung,
Hun hman hi Bawihte;
Kei ka duhaisam kha,
Awmlai hrangin kianzai a rel tir maw.

3. Khuanu malsawmna dawng a,
Hraichaw nau lo piang chu,
I tawng ve silo maw;

Thinlai a na lung ka vai ruai e.

Best Budget laptop 2021

Lenmawi

Phuahtu: Selsangpuia

Ka thinlai luahtu lenmawi, tiang ema lungdumtu,

Tawng leh hian ka mawi silo ngaihlungrun;

Aw...aw...aw...

Ka thlang ber che kumtluang run lumpui tura'n.

Intawn chhung reilote pawh,

Ka tan a hlu chuang e;

Tudang reng ka ngai bil lo I kiangah chuan,

aw...aw...aw...

Samang ṭhen zai i rel lo'ng aw lungrunpui.

Ngilh ni awm lo sakhmelmawite,

In lenna vangkhuaah min han dawn ve che maw;

Kar hla Di enchimloh ka tan vul zel ang che.

Ka thinlai luahtu duhlai, kan kar lam hla mah se,

Kumtluangin rinawmna biahthu vawng zel ila;

aw...aw...aw...

Chutin hlimte'n i leng ang aw kumtluangin.

Ngaihzual

Phuahtu: Joe Hlondo

Bawihte i zun leng ngaiin,

Laikhum zawlah tlaikhua ka var ṭhin;

Mualzapui kar danah lengin,

Sakhmel tawng lo vin;

Chhingmitthla an i cham reng ṭhin e,

Thinlairuka'n i cham reng mai.

Dawnin a na ngei e!

Di ngaih lunglen ka tuar thiam lo;

Suihlung a phang thin e,

Lengdang min chhai san lul suh aw ngaihzual;

I zun leng ngaiin eng dang ka dawn thei lo,

Sakhmel tawn nan, ka ṭuanna tlang aṭang hian e;

Ka lo haw thuai dawn.

Engtin min ngai ve che maw,

I thinlairukah ka cham ve ṭhin em?

Kei zawng i zunah chhawl iangin, 

Aw ka uai reng si; 

Ngilh ni reng i awm thei mawlh si lo,

Thinlairuka'n i cham reng mai.

I tawnah biahthu ka hlan zawngte ngilh lo la,

Lengdang ṭang bel mai lo vin,

Min nghak hram rawh aw.

Mp3 download-na

Mampui

Phuahtu : Sangtea Ronald

Lungrunpui, engtin tuar ang i maw lunglen hi mahte'n,

Ṭuanzai reng ka rel thei lo suihlung muangte'n;

Ka ṭangah bei leh la, chutin ka dawnlungruk kimte'n ka hlan nang che.

(Ka lo nghak reng ang che duhlai mampui)

Duhaisam nang ang reng tawng leh hian ka mawi lo bawihte;

Tiang ang renga lungdumtu chu khuanu paw'n,

A her rem ve mahna, chun leh zua sêlna ankâ chu tam mah se.

Suihlunglen a zual si i hlimthla thlir chang te hian duhlai,

Hun leh nite hian her chhuahpui mai se aw;

Ka thai chang mai teh la, hlimte'n hmangaihna par tlanin kan len ve nan.

I tello chuan

Phuahtu: Henry MS Dawnga

In vangkhawpui laitualah,

Chhingkhual rawn changin lungrunpui;

Karah ka lo dawn ngai lo,

Nang nen ti ema hmangaihna.

A rei lo em kan hlimlai ni,

Tunah erawh lenna tlanga dang leh si;

Lung ka vai ruai e, i tello chuan,

Aw, tleitir lenmawi.

Zantiang chhawrthla eng hnuaiah,

Ka dawn vawng vawng ṭhin hlimlai ni;

Duhte'n i ṭang bei lai zan,

Ngilh ni awm thei hian ka mawi lo.

Lenna tlang dang ṭhin mah se,

Min ngilh bik lo'ng che lungrun;

Nang nen biahthu kan hlan zawng,

Vawng dun zel ang aw kumtluangin.

Mp3 download-na